ياشينك فضايح !
9 أكتوبر, 2008
أمس و اليوم إسم ليبيا تكرر أكثر من مره في النشرات اليوميه في التلفزيون النرويجي (NRK1) و أحد الاخبار الرئيسية كان علي ليبيا و السبب طبعا إن من سنتين دارت شركة الستات أويل Statoil و الهيدرو Hydro ( كانو زوز شركات الان شركة وحده أسمها ستات أويل هيدرو StatoilHydro ) النرويجيات المتخصصات في البترول و النفط بعقود مع ليبيا ( وين وكيف و مع من الله أعلم ؟؟؟ ) بس الي حصل إنه صار فيه لعب تحت الطاولات و رشاوي لفلان و علتان ـ القطط السمان ( الدينصورات العملاقة ) ـ و طبعا الكلام هذا كله ضد القوانين الصارمه الي فالنرويج ،،،
التحقيقات علي قدم و ساق لمعرفة من المتورط في هالعمليات الغير قانونية من الجانبين , من المسؤال الرئيسي في تقديم الرشاوي ولمن قدمت هذه الرشاوي بالتحديد , ومحاسبته محاسبة صارمه تصل الي حد الغرامة و الطرد من الشركة باش ماحدش يدير الي داره الشخص هذا …. وتم طرد زوز مدراء فعلا ،،،
حاليا يتم التحقيق مع رئيس شركة الستات أويل و الهديرو الحالي علي هذا التقصير و محاسبته لتقصيره و مساهمته في استخدام الفساد المنتشر في ليبيا للحصول علي عقود عمل للشركتين في ليبيا ،،،
طبعا فيه من حيقول شنو دخله المدير في المواضيع هذي …
نقوله لا بالعكس أي حاجه تصير في الشركة المدير هو المسؤال الاول و الاخير ، هذا علاش تم طرد زوز مدراء و الثالث جاي في الطريق
الي واجعني أنه بلادنا فيها القطط السمان هذو ! و الي واجعني أكثر أنهم يعطو في فكرة فاسده علي كل ليبيا ! والي يحرق الاعصاب و يخليك تنتش شعرك و تشد الخلي أنه قد ماتدير روحك كويس باش تعطي فكرة كويسه علي بلادك يجيك واحد ولد حرام و خناب يلعب في الدنيا كلها و يرجعك لنفس النقطه الي بديت فيها من جديد ,,,
أني عارف أنه مش كل الليبين هكي ولاكن النسبه القليله الي مسيطرة علي مقدرات شعبنا الغلبان هي الي تعطي في الفكرة الوسخه هذي علي كل الليبين بلا أستثناء … هذا علاش دمي محروق و متكنطي ,,,
ياربي أمتى بس نتفكو من هالكحيلات الي نهبو بلادنا و ضيعو ثرواتنا و مش غير هكي و بس .. و عطو فكرة و سمعه زي الزفت علينا كـ ليبيين ؟
أمتى بس بلادنا تنظاف من الشكالات الوسخه هذي ؟
أمتى يفيقو لروحهم و يعرفو أنهم مايضروش في نفسهم , و أنهم يضرو في غيرهم بعمايلهم الي تقشر الوجه ؟
أمتى يتحشمو علي وجوهم و يقدمو أستقالاتهم و يخلو الساحه للناس الي عندها نيه تنظف الوسخ متاعهم وترجع ليبيا لعهدها الاول ؟
أمتى ؟
أمتى ؟
أمـــــــــــــــــــــــــــتى؟