iAnas

14 من التعليقات لـ “ياشينك فضايح !”

1. nasimlibya قال:

   09/10/2008 عند 02:09

   اولا مفيش في بلادنا قطط سمان لان القطط كائنات جميلة ورقيقة
   واني منحازة ليها عقليا وعاطفيا فلذلك خلي نديرو بحثونجيبو مسمي اخر يليق بالفئة اللي تتكلم عليها
   هذا واجبك يا عمو انس واني واثقة انك حتلقي مسمي يكون جدير بوصفهم
   ثانيا هذا حال اي شركة وهم علاش مستغربين وانت علاش متكنطي ؟؟؟ هل تتوقع ان اي شركة تخش البلاد تخش هكي وخلاص ماهو لازم من بعض المسميات الكثيرة لهذا ولذاك
   اني فرحانة لانك نقلت خبر يخص ليبيا ممكن مش رح يوصل بكري عن طريق اعلامنا وسعيدة لان عندك من الوطنية الكثير بس في نفس الوقت رد بالك علي نفسك !!
   موفق يا عمو
2. iAnas قال:

   09/10/2008 عند 19:48

   أهلين وسهلين أختي نسيم ليبيا !
   حتى أني معارض للتسميه هذي صدقيني لاني حتى أني من عشاق القطط و العائلة القططية ككل أبتداء من الاسود و النمور و الفهود وصولا للقطط وباقي السنوريات ،،،
   أصدقائي يدعونني بالقط لطبعي الخاص ، أحب الظهور و احب الدلال و في نفس الوقت مستقل و حر ولا أحب القيود ،،، لذلك أنا أعترض علي تسمية هذه الاصناف من المستغلين و المتسلقين و الوصوليين بالقطط السمان ,, هذا علاش حطيت بين قوسين دينصورات عملاقة ,, وحتى هذي ماتطلعش عليهم ,, وماهوش موضوعي البحث عن أسماء تليق بالفئة هذي من البشر ونخلي الموضوع هذا للناس المتخصصه في أختيار الاسماء !

   اليوم تطور الموضوع في الاخبار و طلعت هلبه حقائق وبلاوي زرقه ،،،
   المبلغ المدفوع تحت الطاوله لشخص واصل وصل لـ 6,000,000 سته مليون يورو ((( معقولة !!! )))

   و أندفع للشخص هذا ( ؟؟؟؟ ) في حساب خاص في سويسرا ،،،،

   المصيبة أنه ماحدش يقدر يوصل فيه و المظلوم الوحيد في الموضوع هذا هو مدير الستات أويل هيدرو ،،، أما الشخص الي خدي الروشه هذي مايقدرش حد يحاسبه و يعاقبه !!!

   ياريت أن أعلامنا يكون نزيه زي أعلامهم و يفضح الناس المرتشية هذي و العدالة و المسؤولين عليها يقيلهم من مناصبهم مهما كان وضعهم في الدولة ، باش تتحسن أحوال ليبيا وإلا مشروع المهندس سيف الاسلام القذافي مش حيصير منه و تقعد ليبيا علي نفس النسق و ممكن أسواء …….

   عارف أنه فيه هلبه ناس قلبها علي ليبيا و يبو مصلحتها وأولهم المهندس سيف الاسلام و المشروع الي يحاول بكل جهده أنه يطبقه في ليبيا ، بس لو قعدنا علي الشكل هذا ياودي قولو علي ليبيا السلااااااام!
3. نزار قال:

   11/10/2008 عند 00:14

   حتى الديناصورات حشاها …نسموهم التووووووووووت السمان
   شنو رأيك
4. بنت ليبيا قال:

   12/10/2008 عند 14:22

   حتى أنت تضحك يا أنس

   ليش هو فيه ناس عندها ضمير توصل للمناصب هذي أصلا واحد من أهم المواصفات الواجب توفرها انعدام الضمير

   وقبل ماتوصل للكرسي تسلم ضميرك عند الباب والا ماتنفعش للمهمة هذي

   الباين موت الضمير بدأعدوى ينتقل اسرع من الانفلونزا بس يختلف عنها كونه مزمن
5. غيدا قال:

   13/10/2008 عند 23:00

   تعرف اللي واجعني إنه هما يعلمو فينا في أخلاق يحث عليها الإسلام واحنا ماشيين التالي

   توة بالله عليك فضيحةزي هادي الدولة متعرف عليها شي في ليبيا أكيدة تعرف

   السؤال هو ليش مقالوش عليها علنا في النشرات

   سياسة التعتيم على الأخبار موضة قديمة توة كل شي واحد يقدر يعرفه طول

   هولاء القنادتش يا نس مش قطط لو لقي من وقفهم راهم موصلولش لهال المواصيل

   لكن مش فيه مثل ليبي قح يقول

   ياميمتي لو تحبيني راك من الدحية نهيتني

   وهادو خنبوا الدحية والشكلاتة والدجاجة ومعدش فيه بيض

   قعدنا غير الخن فاضي وخلاص

   ومدامه مفيش منو يحاسب معنها بتقعد زي مطعم البرعي اللي يبي يعبي بطنه يمشيله طول
6. منير قال:

   14/10/2008 عند 11:10

   أوووووووه سرقة .. خنبة .. نصب .. إختلاس .. لا لا لا مش معقولة ، هذا كله يطلع من شرفاء الدولة .. تي لا لا لا أنتم غالطين راهو تي كيف ايصير هكي كيف!!!

   ” ألا لعنة الله عليهم جميعاً دنيا و آخرة من يأكلون بغير حلالهم ، ألا لعنة الله عليهم “
7. iAnas قال:

   14/10/2008 عند 22:45

   نزار !
   قتلك ماعنديش جواجي ندور أسم ليهم لانه قد ماتدور مش حتلاقي حاجه توصفهم مزبوط ,,,

   بنت ليبيا !
   صدقيني فيه ناس شريفه و مصلحة البلاد قبل أي شيء .. بس الاغلبية المرتشية مغطية عليهم ، و بعدين يحاربو فيهم باش تقعدلهم الساحه فاضيه لرشاويهم و أستغلالهم و كروشهم الي معبية بالزقوم ..
   * الزقوم حاجه تختلف علي الحلقوم علي فكرة . هاهاها

   غيداء !
   أني حاسس أنك تجرجري فيا في الكلام مش عارف علاش ؟ هاهاها
   ماتكلمينيش عليه التعتيم الاعلامي ماتكلمينيش عليـــــــــــــه
   تي المفروض يجو يتعلمو مننا ثقافتنا الاعلاميه الرائعه هذي ، تي وين عايشه أنت؟
   أحسن نشرة تتفرج عليها و ماتطلعش منها بنتيجه و ماتفهمش منها حاجه هي النشرة الليبية ! هذا مـ الاخير طبعا و خودي ولا خلي !
   كانه مش من mbc أيامات كيف بادي البث الفضائي طبعا فـالـ 1993 وبعده الجزيرة فــالـ 1994-95 باش تعرفنا علي النشرات المقومه و بدينا نفرقو و نميزو ،،،، ياسر خلاص هذا الكلام بس نحصل عليه تشلبيخات كويسات في المطار ( شن تبي ثاني ؟ ) هاهاها نبصرووو ياجماعه مش تاخدوها بجديات ،،،،،،

   منير!
   مصمصم فمك بالزهر و العطر قبل ماتتكلم علي شرفاء دولتنا و الي ماسكين مناصب هكي كبرها في الحكومة ،،،، و نصيحه مصمصه بالاتشيدو زيادة ! نبصروووو !!!
   واااااااااااااك وخلاص أني بنشرك شلاتيتي و نشد الخلى قريب من العار الي يطلع كل شويه في النشرة علي ليبيا ,,,, علي الي ماسكين مناصب في الدوله و من تحت الطاولات ياخدو في رشاوي باش يمشو معاملات لمصلحة ليبيا كلها …. حاجه تخليك تلهد علي قنفوذ ………………
8. slv قال:

   20/11/2008 عند 17:43

   من معى
9. Jamal قال:

   14/07/2009 عند 06:03

   السلام علي الأكرام – والله مش عارف بيش نبدا – يقولوا الجهل مصيبة لكن مرات يكون نعمة – ياخوتي الليبيين أنا موظف في قطاع النفط من سنين طويلة – وليبيا من المعروف أنه مافيهاش شي غير النفط يعني هو الدخل الوحيد للبلاد و الباقي وهم – لكن الغريب مافيش حد سأل من قبل كم يكلف فينا برميل النفط و كم نربحوا من بيعته – و هنا هو الجهل أللي نتكلم عليه – ياسادة برميل النفط يكلف في الشركات الوطنية أللي هي أتبزعق قصدي مدرائها يبزعقوا في الميزانيات و مع هذا كله تكاليفه توصل لأقل من دولار واحد – صدمة صح؟ برميل النفط يكلف انتاجه أقل من دولار واحد و شوف حسبة السنوات السابقة بكم كان ينباع في السوق و كم كان الإنتاج يقولوا و أنا مش مصدق أنهم ينتجو اثنين مليون برميل يومي و احسب الارباح بعد خصم تكلفة انتاج البرميل وهي واحد دولار و من المضحك المبكي ان الواحد دولار مقسم علي مصاريف متعددة مثل الحفر و الانتاج و الاستكشاف و مرتبات الموظفين و هلما جرا من المصاريف علي ليبيين و اجانب . والسلام
10. hanan قال:

    25/07/2009 عند 13:41

    حسبنا الله و نعم الوكيل
11. freesun قال:

    01/08/2009 عند 14:12

    عيب عليك ياخوي يا انس اكيد انت سمعت اسم الدولة المعنية غلط
    اكيد سمعتهم يقولوا الدولة اللبنانية موش الليبية والا معقولة احنا ولينا قطط سمان
    هههههههههههههههههههههههه
    والله هم يبكي ويضحك المشكلة انه في النرويج داروا تحقيقات واقالوا مدراء
    لكن عندنا تلاقي الحرامية كل مرة يترقوا تقول الخنبة وسيلة للترقية عند المسؤلين
    مشكور خويا على الموضوع
12. وديع قال:

    19/08/2009 عند 21:00

    نهار مزقح وخلاص ،،
    وعلى ذكر تشويه السمعة
    أمس أنا وواحد من خوتك العربان في نقاش حاد على قصة تشويه السمعة هذه (في دبي)
    والموضوع كان على هلال رمضان
    وأنا نحاول ندافع لكن مافيش فايدة
    هو يقولي يعني انتم الليبيين اللي جد جد جدكم فلكي وباقي العالم الإسلامي مايعرفوش حاجة اسمها فلك..
    طبعاً من غير ماتحس تلقى روحك بجديات محرج
    يعني احنا دوناً عن العالم الإسلامي كله نعلن أن رمضان الجمعة (كاكتشف طبعاً) قبل وقته بـ3 أيام
    يعني ليبيا اللي كل شيء فيها متدمر تطورت في الفلك بس!!
13. موش لازم قال:

    08/03/2010 عند 13:50

    السلام عليكم . الصراحة الموقع هذا دخلته بالصدفة لكن النقوللكم اللي ما عاشش في ليبيا فاتة الجو هلبة .
14. lamies قال:

    13/06/2010 عند 11:38

    السلام عليكم
    اعجبني كثيرا هذا الموقع واشكرك علي مجهودك
    فعلا انت شباب المستقبل
    كيف اسجل
    وشكرا