iAnas

36 من التعليقات لـ “iPhone 3G S”

1. Tarek Siala قال:

   10/06/2009 عند 03:41

   بالرغم لعدم إقتناعي بهاتف الأيفون من ناحية عدم القدرة على التحكم بكل إمكانيات الهاتف مثل الإبحار في الذاكرة وإرسال وإستقبال الملفات عبر البلوثوت وقفل الهاتف الا بإشتراك رسمي وعدم التعامل مع الكمبيوتر الا من خلال برنامج الأيتونز، إلا أنني لا أنكر أن الشركة أبدعت في عدة مجالات أخرى لعل في مقدمتها شاشة اللمس، مماجعلها السباقة في هذا المجال بالرغم من أنها تعتبر حديثة العهد بصناعة الموبايلات

   تمنياتي لك بالحصول على الهاتف الجديد
2. MnSoR قال:

   10/06/2009 عند 04:07

   السلام عليكم

   الصراحة انا متفجئ وسعيد في نفس الوقت كيف…!!!

   اولا متفاجئ : لعدم إ حداث تغيير كامل لل iphon 3g التغييرات بسيطة جدا بل هي معدومة في تصميم الجهاز
   فاختصر التطوير علي زيادة السرعة كما اسلفت انت سبقا وبعظ المزايا الاخري بنظام التشغيل والكاميرا.

   اما سبب سعادتي وهو اني املك iphone 3g والاصدار الجديد لا يكاد يختلف عن سابقة الذي املكة

   واستغرب في الكم الهائل من الاشعات السابقة لصدور iphone 3g s منها علي سبيل الذكر لا الحصر ان التفاحة الخلفية ستضئ.

   عمومـــــــــــــــا انشاء الله نشفوه في الاسواق الليبية قريبا
3. How to Make Thousands of Dollars Posting Links on Google قال:

   10/06/2009 عند 21:22

   Thanks for posting, I’ll definitely be subscribing to your blog.
4. bumedian قال:

   11/06/2009 عند 05:00

   السلام عليكم …

   لمن هم في موقعنا … اعتقد ان السؤال الان هو الحصول على فك للفيرم وير الجديد لكي يعمل على اي شفرة …
   مع ان فريق ديف تيم قد اكد ان الايفوم 3.0 يمكن فك حمايته الا انني اشك في اننا سنصل عليها في وقت قريب … لنتمكن من الاستمتاع بالمزايا الجديدة … بغض النظر عن حصولنا على النسخة الجديدة من الجهاز نفسه … وتلك هي الخطوة التي ستلي خطوة فك الفيرم وير الجديد لاستخدامه على ما لدينا من اجهرزة …

   شكرا لك ..
5. iAnas قال:

   12/06/2009 عند 00:52

   أهلين طارق سيالة !
   بالنسبة لموضوع أن الابل سباقه في شاشة اللمس فهذي للأسف معلومه غلط لان شركة الـ LG سبقت الجميع بهاتفها المعروف من شركة الموضه الشهيرة Prada  والذي سبق الجميع في موضوع التحكم بجميع خصائص الجهاز عن طريق شاشة اللمس , من ثم جاء الاسطورة الـ iPhone ليتربع علي عرش الهواتف النقالة بهذه التقنية و سيطرتها لن أقول المطلقه حتى لا تحسب تحيز لشركة آبل .
   موضوع الارسال بالبلوتوث و غيرها وعدم دعمها للـ MMS هو صدورها أولا في أمريكا و المعروف ( ليس للجميع طبعا ) أن الامريكان لا يهتمون كثيرا بأستخدام البلوتوث و أرسال رسائل و أغاني و مقاطع الخ الخ لبعضهم البعض , و حتى رسائل الوسائط المتعددة لا يستخدمها احد , أغلبهم يبعثون رسالة ألكترونيه وحتى الرسائل العادية ليست مستخدمه كثيرا بالمقارنه مع أوروبا و باقي العالم , حيث يعتمد الامريكان كثيرا علي الكلام …
   بالنسبة لأغلاق الهاتف علي شركات هاتف فأريد أن أوضح شيء هنى … مسئلة الغلق مسئله لصالح المستخدم وحيث تسمح لك الشركات بشراء الهاتف بمبلغ 200 دولار مع خطة أتصال لمدة سنه تدفع فيها عشرة دولار شهريا أو أكثر بقليلا مع أعطائك ساعات أتصال و رسائل مجانية مشموله للقيمة الشهرية و كمية من الكيلو بايتات لأستخدام الانترنت هي لصالح المستخدم بدلا من شراء الهاتف مفتوح من الشركة نفسها بمبلغ 600 دولار ممكن اكثر ممكن أقل و ستدفع أكثر لأتصالاتك و رسائلك و أبحارك الانترنيتي … أليس كذلك ؟

   علي كل حال سيبقي الـ iPhone تحفة الابل و سيبقي ملهم لباقي الشركات حتى مع حداثة عده بالمقارنه بغيره من شركات الهواتف النقالة …..

   لذي الجيل الاول من الاي فون و أعتقد أنه حان الوقت لقتناء هذه التحفة ….
6. bumedian قال:

   12/06/2009 عند 01:26

   السلام عليكم ..
   ربما تكون فكرة الحصول على الايفون من شركة بخطة امرا جيدا ولكن لا نملك هذه الخاصيات هنا
   ولا اعتقد انه في القريب سيكون الايفون على احدى شركاتنا لان هذه السياسة غير متبعة هنا من اساسه … فبذلك ليس امامنا الا ان ناخذه مفكوكا من الشركة او بالفك الخارجي
   و اعتقد ان تميز الايفون هو في نظام التشغيل الخاص به و كثرة التطبيقات بعد فتح الشركة المجال للمطورين للابداع في تطبيقاته … ولا اعتقد انه هناك اي مقارنة بين نظام تشغيل الايفون باي نظام تشغيل اخر في الهواتف النقالة …

   شخصيا استعملت الجيل الاول و انا الان استعمل ال 3 جي و وجدت فرقا كبيرا بينهما فالثاني اكثر قربا من الهاتف عن الاول ، الذي هو اقرب الى الايبود … في تصميمه وحجمه

   و في انتظار صدور ال3 جي س … اعجبني موضوع الكاميرا ودقتها الاعلى عن النسخة الحالية …

   شكرا
7. iAnas قال:

   12/06/2009 عند 01:34

   أهلين MnSoR !
   انت متفاجئ أني مصدوووووم بصراحه ! مكانش العشم يا آبل …. ياشماتت كل شركات المبايل فينا بعد هذا الانتظار الطويل وعلي أعصابنا …. و في الاخير الشكل الخارجي قاعد نفسه !!! أني جايتني تلول من الخلفيه الي تتشقق و بنشريه و خايف يتشقق مني .. مع العلم أني من النوع المحااااافظ جدا علي حاجاتي … و أستنيت سنتين كاملات توى نسحبته بيغيرو الخلفيه بخلفيه مطاطية لاكن الباين الاصدارة القادمه السنه الجايه كان ربي عطانا عمر ….
   الرائع في الموضوع أن أسعار هواتف الـ iPhone لا تتغير حتى الجيل الاول منها محتفظه بنفس الاسعار علي عكس هواتف النوكيا و السوني أريكسون بعد سنه من الموديل يسقط سعره لأكثر من النصف … أسئلني لاني مجرب الغمه هذي … توى تلفوني هذا مش ناقصه حتى حاجه و قاعد تقول جديد لاني محافظ عليه نبيعه بثلثمية دولار و نزيد عليهم و نشري الجهاز الجديد .. و بالشكل هذا مانخسرش هلبه …
8. iAnas قال:

   12/06/2009 عند 10:04

   مرحبا بـ هشام بوميدين !
   صدقني خليت ردي عليك للأخر لانك ماخليتليش فرصه الحق , أني كيف قلت يا هادي و بديت نرد علي الردود لقيتك أمحمح رد يستني في الموافقه خلاني نوقف الرد ع الباقيين و نخش نرقد هاهاها ….

   عارف أنك في ليبيا و مايوصلك التلفون غير شدني و نشد معاك , و ياريت يوصل بسعر مناسب , و مجموعه الديف ديف مش مقصرين و نازل عندهم الاصدار الاخير من زمان و خادمين عليه و طلعو الفك متاعه … يستنو في نزوله للعامة باش ينزلوه …

   علي فكرة آبل عندها التلفون مفتوح في كذا دوله من شركة أبل نفسها … الدول الي تمنع الاحتكار في قوانينها … زي نيوزيلاند بس هذا حيكون أغلي بكثير لو نزل لليبيا يا خوي … لانه مفتوح من الشركة الام ..

   بالنسبه للكامرة ,, فعلا كامرة الاي فون مع أنها 2 ميچا بيكسل لكن وضوحها و جودتها بخمسه ميچا في النوكيا و السوني أريكسون و نتحدي أي حد يقولي العكس … و حاليا في الجيل هذا 3 ميچا بكسل يعني حتكون فعلا جوده صور رائعه و تصوير فيديو أروع .. مع العلم أنه عندي فيديو في الهاتف حاليا …. و نسخ ولصق … و وسائط متعددة … الخ الخ الخ

   أسعدني ردك و تفاعلك … و السبب واضح طبعا أنك من عشاق الاي فون مثلي.
9. حسناء ليبيا قال:

   29/06/2009 عند 16:28

   الف شكر لطرح هدا الموضوع بس انى مش من عشاق الاى فون بس حابيت تكنولوجيا يلى فيه الف شكى انس وتقبلنى صديقة لى مدونتك الكريمة
10. طه قال:

    08/07/2009 عند 23:19

    ممكن سعر ايفون في اليبيا اني انفكر نخد واجد العادي
11. iAnas قال:

    09/07/2009 عند 14:33

    أهلين حسناء ليبيا ،،، الناس أذواق زي ميقولو ، و ماعجبكش الاي فون أكيده فيه اكثر من شركة تستحق الاعجاب …. أنت و ذوقك طبعا !

    مرحبتين طه ،،، بالنسبة للأسعار في ليبيا مانعرفش عليها حاجه ، مع أنه أني حاليا في ليبيا بس علاقاتي بالاوساط التلفونيه و السوق تكاد تكون معدومه ( حلوه تكاد تكون معدومه هاهاهاها ) …. من سنتين جبت معاي تلفونين مفتوحات و جدد بباكواتهم علي أساس بنبيعهم … درهولي كبدي الي هذا يتشرط يبيه بسوم و في السوق العادي حقه في الالف ولا تسعمية مش عارف بالظبط بس غالي م الاخير …. توى أكيده في الخمسمسية ستمية دينار ليبي .. أنت بري و شوف و لف علي كذا محل و بعدين لما تشريه تعالي لخوك أنس و أني ننزلك عليه الاصدار الاخير 3.0 بكل مزايه و بالبلاش هدية من خوك أنس . بس هذا في حالة شريته توى قصدي لاني مسافر لتونس يوم 16 الشهر …
12. طه قال:

    12/07/2009 عند 02:56

    يا انس ونبي كن تعر ف سوم مزبوط
13. طه قال:

    12/07/2009 عند 02:56

    هدي اميل nokianokia131
14. طه قال:

    14/07/2009 عند 15:26

    اني اليوم امشية شارع المدر الكت iPhone 3G 8 بي 840 دينار شنوا هدي سوم
15. طه قال:

    15/07/2009 عند 01:13

    من افضال ايفون ام nokia n97
16. iAnas قال:

    16/07/2009 عند 20:21

    شوف خوي طه , أني أبعثلك أيمال و بعثلك رسالة قصيرة علي رقم التلفون الي بعثهولي و أتصلت بيك لما ماوصلنيش منك رد ولقيت أن تلفونك مسكر …. ع العموم السعر في ليبيا ديما مبالغ فيه شويه … الله غالب عرب المدار و حتى برج الفاتح يسحابونا جايين من المريخ ولا بكستان مانعرفوش في الاسعار الحقيقية للأدوات الكهربئية و التلفونات الخ الخ …

    بالنسبة للسعر المعروض لو كان 16 چيچا كويس بس لو كان 8 فصدقني مبالغين فيه الرقم بشكل خيالي … طبعا هذا لو كان الاي فون الجيل الثالث …. بس لو كان الجيل الاول الموديل القديم فسعره في الخمسمية أو الستمية بالكثير … بنفس حجم الچيچات طبعا …

    لقيته في برج الفاتح و الاخير الي حاط عليه موضوعي هذا 16 چيچا مفتوح من شركة أبل علي كل شركات الهواتف بـ 1800 مع أنه مزال منزلش حتى في أوروبا تصور هاهاها فالحين بس السعر غااااااالي غاااااااالي جدا … بس مفتوح يعني لا إتعب روحك في التحديثات لا حتى حاجه ….

    موضوع المقارنة بين النوكيا N97 و الـ iPhone بصراحه أني كنت مجنون نوكيا و أخر موديل ينزل من النوكيا نشريه و حتى الـ N97 خديته و أستخدمته و بعدين شريت الاي فون … بصراحه و ماتضحكش عليا لما تشد الاي فون في أيدك تحس أنك فعلا شاد تلفون محترم مش طرف بلاستك …. مش تحيز للأي فون لكن بجديات الاي فون أي فون … كذب عليك !

    وفي الاول و الاخر هي عملية أحتياجات و أذواق .. أنت تحب السوني أريكسون و فيه غيرك يحب السامسونج وفيه الي غالي عليه السيمنس .. أنت و ذوقك و أحتياجاتك وأني ماشي معاي الاي فون و ملبيلي كل رغباتي …. بكل بساطة .
17. طه قال:

    19/07/2009 عند 23:16

    يا انش اشرية واحد 800 دينار اليوم من شارع المدر الكن مش معرب
18. طه قال:

    21/07/2009 عند 17:37

    اني عندي ايفون باهي درلة ضبط المصنع معش يبي يولع
19. طه قال:

    29/07/2009 عند 00:23

    وينيك يا انس نبي برامج ايفو ن والعاب
20. iAnas قال:

    31/07/2009 عند 13:00

    أهلين خوي طه و مبروك عليك الـ iPhone ,,, تبيده بالهني يارب !

    بالنسبة للبرامج و الالعاب فهي موجوده في متجر البرامج في برنامج iTunes و تلاقي كل البرامج الي تخطر علي بالك مدفوعه و مجانيه و علي كل شكل ولون … و بعد تحميلها علي جهازك تربط تلفونك و تعمله عملية تبادل مع البرنامج و تلاقي كل البرامج و الالعاب الي منزلها علي جهازك موجوده عندك في تلفونك … فيه حاجه ثانيه سهله بس مانعرفش هل موجوده في ليبيا ولا .. لو عندك wi fi في حوشك أو في مقهي أنترنت فتنزيل البرامج مباشرة لهاتفك من غير ماتحتاج لحاسوب … بس لازم يكون عندك حساب في متجر الـ iTunes باش تتمكن من تحميل البرامج و تستمتع بيها .

    لو عندك أي سؤال ثاني حول الموضوع أبعثلي أيمال توى نرد عليك …
21. atef قال:

    01/08/2009 عند 19:32

    السلام عليكم اني موجود فى ماليزيا ونبى نشرى iphone 3gs امس نزل فى الشركة maxs
    نبى نسال الاخوة فى ليبيا بكم سعرة فى ليبيا بزبط ويخدم على شركة المدار ولبيانا
    ارجو الرد
22. iAnas قال:

    01/08/2009 عند 19:43

    أهلين خوي عاطف ومرحبتين بي ردك الاول عندي في المدونة ،،،
    نبي نقولك علي حاجه مهمة جدا ،،، أذا كان الـ iPhone 3Gs مفتوح من شركة آبل نفسها تقدر تشغله علي أي شبكة مهما كانت ، بس لو أنت شاريه بعقد ملزم و خطة تسويقيه معينه فأعتقد أنه يلزمك عملية جيلبريك و أنلوك للجهاز باش تقدر تستمتع بيه مع أي شركة ثانيه …

    بالمناسبة أنا شريته و حيوصلني بعون الله يوم الاثنين … حنعمل عليه تقرير مفصل أول ماينزل بعون الله!
23. طه قال:

    03/08/2009 عند 03:34

    حتني يا انس متعي ايفون بعته با نغد ايفوان g3sممكن با 1400دينار في شارع المدار
24. طه قال:

    03/08/2009 عند 03:35

    كيف iTunes انشاء حساب فهي
25. iAnas قال:

    03/08/2009 عند 16:50

    أهلين طه ! ومبروك عليك الاي فون … تقدر تسجل حساب في الايتونز بالطريقه الي موجوده في مدونة عالم أبل تلاقيها في الوصلة هذي و تبعها و بإذن الله تفتح حساب مجاني من غير بطاقة أأتمان و تستمتع بالبرامج المجانية الموجودة فيه …

    http://www.apple-wd.com/2009/07/itunes-account/

    و مانبيش ننسي شكري الخاص للأخ عبد الملك الثاري صاحب الشرح و التدوينه بالخصوص …
26. طه قال:

    15/08/2009 عند 03:29

    كم سعر ايفون توا في شار ع المدار اني بعته با نغد واحد
    @
    @@@@@@@@@@@@@@@@@@222222222
27. طه قال:

    06/10/2009 عند 20:57

    nokia n 900
28. احمد زيد قال:

    13/02/2010 عند 14:22

    السلام عليكم..معليشي يا شباب..بنسئلكم كم سعر الايفون 3gs توا في ليبيا ؟؟؟وفي امريكا..وبنفهم حاجه…كان خديته مفتوح من امريكا بكم ؟؟؟وكان خديته مش مفتوح وفتحته في ليبيا بكم يفتحوه؟؟؟وشن الفرق بين يفتحوه هنا ولا في امريكا؟؟؟
    وشكر..
29. iAnas قال:

    13/02/2010 عند 16:30

    أهلين أحمد زيد !

    صدقني مانعرفش قداش سعره في ليبيا , وبالنسبة لسؤلك خلي نشرحلك شيء ممكن أنت مافهمتاش مني ,,,
    في شركات الاتصالات في العالم تقدم في خدمة لعملائها و زبائنها ( مزال ماوصلتش ليبيا الخدمات هذي للأسف ) أنها تبيع تلفونات بأسعار زهيدة و رخيصه مقابل أنك تشري منهم خط و الهاتف هذا مايشتغلش علي أي شبكة ثانيه غير شبكتهم هما لحد ماتكمل الالتزامات الي عليك مع الشركة … فكرة الموضوع أنها تعطيك تلفون بشكل رخيص ( مدعوم يعني ) و أنت تدفع بالتقسيط مع دفع فاتورة أتصالاتك لحد مايتم العقد و تاخد التلفون تفتحه علي الشبكات الاخري و تقدر توقف العقد معاهم بعدها …

    توى نجو لموضوع الاي فون المسكر فهذا صايرله نفس العملية الي قتلك عليها فوق .. شركة أتصالات معينة تسكر الجهاز علي شفرتها و ماتقدرش تستخدمه مع شركة ثانيه لحد مايتم العقد معاهم , فيه برامج هاكرز تفتح التلفون هذا و تخليه مفتوح علي الشبكات كلها لو حبيت … أني حاليا مش في ليبيا للأسف كان هذا راهو فتحتهولك بالبلاش !

    التلفون المفتوح من الشركة الام أغلي بكثير بس تقدر تركب عليه الخط الي تبيه أنت من غير أي مشاكل و تديرله تحديثات كل ماينزل تحديث من غير مايتسكر عليك مره ثانيه …

    فهمت ولا مزال نشرحلك ؟
30. احمد زيد قال:

    18/02/2010 عند 17:12

    شكرا يا انس ..صحيت ..وربي يخليك لينا .(^_-)
31. الحايرة قال:

    01/03/2010 عند 14:16

    أنا نبي نشريه بس حايرة هل تشجعوني أن أنا نشريه ولأ لأ
32. شريف المغربي قال:

    02/03/2010 عند 01:36

    باهي خوي انس بس بي كم المفتووح من امريكاااا ؟؟؟ يخدم علي ليبيانا او المدار
33. iAnas قال:

    02/03/2010 عند 01:56

    @ أحمد زيد !
    ماعنديش فيه جميل خوي … و أي خدمه تفضل أسئل و إن شاء الله نقدر نساعدك فيها !

    @ الحايرة !
    مانقدرش نقولك أشريه ولا ماتشريشي ,,, القرار الاول ليك و لمتطلباتك الشخصيه و أمكانياتك المادية ,,, لو عندك أمكانيات ماديه جيدة فليش لا , ماعندكش فيه أكثر من خيار أخر بديل للأي فون و يعطيك نتائج مُرضية .

    @ شريف المغربي !
    صدقني يا خوي شريف مانعرفش قداش سعرة في أمريكا مفتوح من الشركة بس حوالي الـ 600 دولار وعلي حسب السعة التخزينية للجهاز طبعا … و هل متوفر في ليبيا ياودي مانكذبش عليك ونقولك فيه ,,,, شكلك مش مركز أني مش مقيم في ليبيا !!!
34. شريف المغربي قال:

    02/03/2010 عند 13:38

    شكرا بارك الله فيك يا خوي انس …..
35. سلام قال:

    03/03/2010 عند 19:44

    السلام عليكم
    بالله iphone 3g 8gb
    بكم في ليبيا الله يبارك فيكم اخوانا
    مشكورين
36. حايرة قال:

    13/03/2010 عند 16:46

    شكرا ليك اخي انس على النصيحة بس ممكن استفسار بسيط قالوا الايفون 2010 بشكل جديد سوف ينزل في الاسواق قريبا في منتصف السنة هذي بس امتى راح ينزل في ليبيا وكم تتوقعوا التمن متاعه وهل صحيح انه سوف يدعم الفلاش