من زماااان وأني خاطري نكتب بالفلاقي ( الدارجة الليبية الطرابلسيه المطعمه ببعض الكلمات من المنطقه الغربيه ) بس ديما نقول لالا خلي المدونه عربيه فصحه , حرام تشوه منظرها بالعامية , بس لقيت حاجه غريبه أن الردود متاعي ديما بالعاميه و المواضيع بالفصحه , فيه حاجه غلط في الموضوع , قصدي في صورة التدوينه كلها !
نحس في روحي محتاج نعبر بالليبي , و بالفلاقي , باش نحس نفسي أنه هذا الشخص أني مش حد ثاني ,,,, باش مانحسش أني طايح من كتاب تاريخ ولا منقز من مسلسل تاريخي …. مش تقليل من شأن اللغه العربيه ولكن للتعبير بشكل أقرب للمتلاقي … لا أكثر لا أقل !
وبهذا الشكل و علي خاطر هالاسباب البسيطه هذي كلها .. ((( أتي وينها كلها – الي يقري يقول حق ؟؟؟؟ هاهاهاها ))) بنفتح قسم جديد أسمه بالفلاقي !!! حاجه خاصه جدا نخربش فيها بالليبي من غير قواعد نحو و صرف ولا تقييد ولا تفتليك .. حاجه من القلب للقلوب ,,, وإن شاء الله تعجبكم الفكرة و تسنجمو معاها !
شنو بنقول ثاني ؟؟؟؟ معاش عندي مانقول ! أهو الي في خاطري قلته والي في بالي طلعته ,,,, فوتو روحكم للفلاقي !