بما أن العنوان باللهجة الليبية فأكيده حيكون الحوار باللهجة الليبية ,,,

اليوم طلع كيف فكرني بجو الشتي في ليبيا ,, المطر خيطين م السمي و الجو مصقع ,, و خطر في بالي لمة العويلة علي صفرة العالة و الشاهي المركر … و المنقل ( الكانون ) مع شويه عود و بخور يفحفح …. و طاسة الكاكاوية الختامية !

صور من المدينة القديمة أوسلو و الاجواء الممطرة الشاعرية ,,,

فقررت اليوم ندير طاسة شاهي و نِكاية فيهم حنديرها باللوز … هكي خطر في بالي !

مشيت لعبت تنس طاولة مع زملائي في العمل و ختمناها سهرية في حوشي علي طاسة شاهي ليبية باللوز !

طريقة التحضير لعمل طاسة الشاهي ,,,

ـ حفنة شاهي حشيشة , أو أربع أكياس ليبتون .

ـ ثلاث كواشيك ( ملاعق ) كبيرة سكر .

ـ ثلاث أو أربع عريقات نعناع ( ربطه صغيرة جدا من النعناع الاخضر ) .

ـ ربع كيلو لوز .

طريقة العمل و التحضير ,,,طريقتي الخاصة جدا!

ـ غسل النعناع جيدا بالماء البارد .

ـ نضع النعناع في براد مع ملاعق السكر و دقها بمهراس ( مانعرفش شنو يقولوله بالعربي هاهاها ) , باش تطلع العصارة متاع النعناع و تفوح أكثر .

ـ نصب عليه المية و نحط كمشة الحشيشة ولا أكياس الليبتون .

ـ نحطوه ع النار و نخلوه لين يبدي يغلي و بعدين نوطو النار من عليه ونخلوه ع النار يطبخ علي نار هادية .

ـ نجيبو طاوة و نحطو فيها ملح ولا تراب ,,, و نحطوها ع النار .

ـ بعد ماتسخن الطاوه بالملح الي فيها ولا التراب الي فيها ( ياحبذا تراب ) هاهاها قويه ياحبذا هذي هاهاها ,نحطو ربع الكيلو متاع اللوز و نحركو لين يتحمص اللوز كله … مش تحرقووووه !

ـ تحول اللوز المحمص علي تركينه و تنظف الطاوه مليح … ماتخليش أختك و أمك ينظف بعدك بلي تنبله زايدة !

ـ تخلي اللوز يبرد شويه و تطفي النار متاع براد الشاهي المنعنع .

أكيده توى الجيران يشمشمو في صنة اللوز المقلي و النعناع المطبوخ في الشاهي …. لو لمحت حد فيهم أعزمه ماتقفصش .

نحطو كمشة لوز في طواسي و نصبو عليهم الشاهي المنعناع و بالهني و الشفي علي قلوبكم كلكم ….

نخليكم مع طويسة الشاهي باللوز , و بما إن أغلبكم سمع صوتي الشجي ( أضحك في سرك ) في الفيديوات الي فاتو فأكيده تبو تشوفو عمكم أنس من وراء الكواليس … يلعب في تنس طاولة ( أحد أروع هواياتي المفضلة ) … من غير روتوش وبكل عفوية !

أي حد يبي يتحدي في تنس الطاوله يخليلي رسالة …

وتوى خلي نمشي نوتي شنطي و عوالتي وقرابيجي للسفر للعاصمة الكوبية هافانا … لمدة عشرة أيام و ترقبو أكيده تقرير مصور عن بلد فيديل كاسترو العزيز قبل مايقول تشااااو للدنيا !

السلام عليكم و رحمة الله وبركاته ….

صحه فطوركم و صيامكم مقبول إن شاء الله ,,,

تسائل الكثيرين عن سبب الانقطاع و الغياب عن مدونتي وكتابة مواضيع جديدة ,,, بعضهم بعث برسالة و الاخر ترك ( off line ) علي برنامج المحداثة و البعض رسالة قصيرة SMS يسأل عن سبب الغياب ….. أشكر الجميع علي التواصل و سأخبركم بالاسباب المتراكمة لأنقطاعي والتي أحببت أن أكتبها علي فترات متباعدة كتدوينات مستقلة و بعد أخذ و عطا قررت أن أكتبها كلها في مكان واحد يحمل كل حججي للغياب المتواصل ….

السبب الاول ,,, كما يعلم الجميع و من موضوع سابق أني أقوم بتصليحات للممر العلوي لبيتي … أنتهي العمل هناك و لم أسترح حتى بدأت في البحث عن شيء أخر لأقوم بقتل الوقت فيه , فبدأت في الممر السفلي و حجرة السلالم ( الكارادوري و دار الدروج ) و الممر الرئيسي للبيتي وضع خزائن جديدة في المدخل لاحتواء كل معاطفي و أحذيتي و خرداواتي (باقي القُربج الزايد ) …. شارف العمل علي الانتهاء …

السبب الثاني ,,, صديقي أمين الجزائري في ضيافتي طيلة شهر رمضان و أسعدني جداً أنه جاء رابع أيام رمضان و مع مجيئه بدأ الاصدقاء و الاحباب في الحضور من كل حدب و صوب .. ( الدكتور آلين من أستراليا ) بقي عندي لمدة خمسة أيام , صديقتين من ألمانيا وجدتهم في محطة الحافلات في يوم ممطر يتسائلان عن أقرب مكان لنصب خيمتهما و المبيت فيها حتى نهار اليوم الثاني وذلك لأن الحافلة التي سيستقلانها سبقتهما بربع ساعة ولا يعرفان مكان للمبيت … فأحببت أن أعمل خيراً فقلت لهما تستطيعان نصب خيمتكما في حديقة منزلي , وفي طريقي للعودة للبيت بصحبتهما رأفت بحالهما ( سخفوني ) فتركتهما تستخدمان حجرة من حجرات منزلي التي أستخدمها كمخزن في الوقت الحالي حتى أقوم بتغيير ديكوراتها ( فقد قررت أن أترك هذه الحجرة بالذات حتى أعمل ديكور حجرة ليبية بكل ماتعنية الكلمة من معنى ) ولازلت أستحضر بعض المواد لعمل هذا الديكور في تلك الحجرة من ليبيا , بقيا لذي ليومين صحبتهما في جولات حول مدينة أوسلو وبعض المتحاف و المعارض و دار الاوبرا الخ ( مرشد سياحي زعميتك ) , الدكتور أرناند من الارجنتين و بقي لمدة يوم و علي أمل أنه سيعود بعد أنهاء دورته في الطب العام للبقاء عندي أسبوع …

السبب الثالث ,,, أصابتي بفيروس الانفلونزا ، و مع كل هذا الهلع العالمي حول أنفلونزا الخنازير أعطاني طبيبي الخاص أسبوع أجازة حتى لا أقوم بنقل العدوى لغيري مع أنه يشك أنها أنفلونزا الخنازير ولكن الاحتياط واجب …. جت منك ياجامع هاهاها حتى أنهي أعمالي المنزلية المتراكمة .

المضحك أني قمت بالاتصال بأمي لأطمأن عليها و لتطمأن علي فأخبرتها أني مصاب بالانفلونزا و أن الطبيب يشك أنها أنفلونزا الخنازير فبدأت تلفونات أخوتي تنهال علي كالمطر للاطمئنان أني بخير و بصحه جيدة ,,, ماما بجديات غُبااااارة لقت حاجه تلم العيلة و حوشنا يولي عرس ….

السبب الرابع ,,, أهتمامي بالانتخابات و ترشيحي للحزب الاجدر في أنتخابات الحكومة النرويجيه ،،، فكان كل أهتمامي محصوراً علي ان أنتخب حزب يهتم بمصالحي و يخدم ميولاتي ,,, فكان أقرب هذين الحزبين هما حزب العمال و حزب اليمين …. و أنتخبت حزب اليمين لعدة أسباب أهمها أعطاء فرصة للاحزاب الاخري لتغيير سياسة الدولة الداخلية و الخارجية و مع هذا فاز حزب العمال بالاغلبية و سيحكم أربع سنوات أخري ( حكم أربع سنوات ماضية ) …. أنتهاء الانتخابات ليلة الامس للعلم فقط .

والان عدت من جديد … سبيس توووووووووون !

عمتكم ليبية راسها و ألف سيف تحرث علينا في هالنو … آل أيه مسابقة طهي و مش عارف شنو !!!! و أني زي الفالح طول سجلت زعميتك فلوووح مانسحبتهاش بتجي علي راسي في أخر حلقة هاهاها …

ماعلينا … يالله أهو الواحد يجرب يدير حاجه جديدة وخصوصا أن نسيم ليبيا طالبتها مني من زماااااااان و أني الحق ماحصلتلهاش فضوي بكل ! بس توى أهداء خاص ليها هي أولا و أخيرا …. و إن شاء الله تعجبها و تعجبكم حتى إنتو …

المتطلبات …

- 200 جرام بسكيوت Digestive .

- 150 جرام زبدة .

- 250 جرام ( بانيو ) جبنة فيلادلفيا العادية مش اللايت .

- 1/4 لتر  ياغورت ( زبادي ) عادي .

- 1/4 كريمة لباني ( الحليب الخاثر الي مع الخفق يولي كريمه ) .

- عصير نصف ليمونة .

- 250 جرام سكر .

- 6 شرائح جيلاتين نباتي ( إحذر هناك جيلاتين حيواني مستخرج من شحم الخنزير اكرمكم الله ) .

خطوات العمل …

- نخرج كل المتطلبات قدامنا علي الطاولة هههههههههههههه

- نحضر طاجين ذو قطعتين ( الي من الجنب فيه زي السبته و تنحل فيزداد القطر متاعه و فيه قاعده تنفصل منه ) . شرح بالفلاقي معليش هاهاها

- نضع ورقة الزبدة حتى تسهل عملية فصل الكيكه بعد التحضير .

- نقوم بدق البسكيوت حتى نتحصل علي دقيق ليس ناعم وليس خشن .. بين البينيين .

- نضيف الزبدة الساخنه لدقيق البسكيوت و نرصها في قعر الطاجين بشكل متساوي لتكوين قاعدة الكيكية ونضعها في الثلاجه .

- نضع الجيلاتين في الماء إلي ان يصبح طري .

- نخلط الفيلادلفيا مع الياغورت ( الزبادي ) مع عصير الليمون مع السكر في الخلاط و بعد الخلط نضيف الجيلاتين الطري ونخلطه معاهم حتى يذوب في الخيط .

- نخفق الكريمة اللباني لنتحصل علي كريمة و نضيفها للخليط السابق و نحرك بالمشبك بتروي ( حلوه تروي هذي هاها ) حتى لا تنحل الكريمه مع الخفق السريع وتتحول لحليب مره ثانيه .

- نخرج الطاجين و نسكب الخليط السابق فيه و ندقه عدة دقات حتى تتساوي الكريمه في الطاجين كله ( قلت دقات خفاف مش هبك لين تجيب خبره ) و نضعها مره ثانيه في الثلاجه لمدة لا تقل عن ست ساعات .

للتزيين أنا أستخدمت الفراولة بما أنها موسمها … واحد يحب يكون مختلف و مميز زعيمتك هاهاها

نقوم بتقطيع الفراولة و أنت و ذوقك طبعا و ترصها في الطاجين علي طريقتك الخاصه … و لو تبي تقدمها طازجه فحتكون أحلي بكثير .. بس أني بما أني بنصورها و الجو مانحكيلكمش حنحاطي فقررت نحط طبقة جلاتين تحتوي الفراولة و تعطيها لمعان خاص …. الجلاتين يحافظ علي الفاكه فترة أطول في هالنو و الحنحاطي و يخلي شكلها قاعد فرش فترة أطول طبعا لو ماتمش القضاء عليها في ساعتها هاهاها .

و النتيجه النهائية زي متشوفو فيها … إن شاء الله تنال رضاكم و أستحسانكم مع اني مكثر الجلاتين هاهاهاها بس طعمتها جت تهبل تتمنى أفيماتكم خصوصا أني ضايف للجلاتين قطرات من ماء الورد فعاطي طعمه وااااااااااااو .

وأول طريف لبنيتي نسومه الغالية …

هااا شنو رايك يا ليبية ؟ قداش بتعطيني م العشرة وبحبي أيدك تربحي الحكاية نو حتى بالامارة شوفي الصوره هذي …

هاهاهاهاهاها لاتعليق!

وبالهني و الشفي علي قلوبكم جميعا …